Mans En Dames Enkelspelfinaal

2 Oktober 2021

Die jaarlikse klubenkels finaal is op 2 Oktober 2021 beslis. 

Dieselfde twee dames finaliste van 2020 het weer in die finaal teen mekaar te staan gekom. Die twee dames, Elma Pretorius en Kleintjie Knoetze, was gewikkel in ‘n maratonstryd van 3 ure!  Kleintjie het uiteindelik met 21-19 geseëvier.

Die mans finaal het twee nuwe mededingers opgelewer – Philip Schoon en Herman Bakkes het mekaar die stryd aangesê. Beide hierdie SVS-spelers  het spel van uitstaande gehalte gelewer.  Herman Bakkes het uiteindelik as die wenner uit die stryd getree.  Die telling was 21-16.

Nadat hierdie twee naelbytwedstryde afgehandel is, was dit tyd vir die hoogtepunt van die enkelkampioenskap – die kampioen van kampioene! Die dameswenner het teen die manswenner te staan gekom om DIE GROOTKAMPIOEN te bepaal.  Dit was ‘n naelbytstryd.  Met die aanbreek van die 23e kop, het beide spelers 18 punte gehad.  Daarna het Kleintjie 1 punt aangeteken en was die telling 19-18 in haar guns.  Herman het egter toe drie wenners gespeel – die balle was amper bo-op die kat en het hy daar die wedstryd in sy guns beklink.  Die eindtelling was 21-19 in Herman se guns en het hy met die louere weggeloop.  Kleintjie kan haarself egter op die skouer klop, want sy het skitterend gespeel.

Die trofees is aan die wenners oorhandig.  Die dames het elkeen blomme gekry en die mans wyn – dit was welverdiend, in ag genome die uitstekende spel waarop hulle ons trakteer het.

​​Outeur: Maureen Annandale